Динара Сәтжан пентхаусын сатып, қайда көшкелі жатыр? Бизнесвуман жоспарымен бөлісті

Динара Сәтжанның 200 квадрат метрлі пентхаусын 88 миллион теңгеге сату туралы хабарламасы - Қазнеттің басты жаңалығына айналды. Ақпараттық порталдардың бәрі жарыса жазып, юзерлер тележүргізушіні мақтаншаққа балады. Көпшіліктің бұлай назар тігуі орынды шығар! Себебі, Динара заманауи үлгіде жасақталған шаңырағын ел алдына шығарып, жарнаманы әлеуметтік желі арқылы жасаған тұңғыш медиа тұлға. Бойтұмарына айналған мекенімен қоштасуды ұйғарған тележүргізушіден қайда қоныс аударғалы жатқанын сұраған едік! Динара Сәтжан, тележүргізуші, бизнесвуман: – Сұлулық салонымды инстаграм арқылы жарнамалап, сатқан болатынмын. Неге үйімді де солай өткізбеске деп шештім. Расымен, сол постымнан кейін, пәтеріме қызығушылық танытқандар көбейді. Дегенмен, сатып алмақ болған кейіп танытып, шаңырағымды көргісі келетіндер де бар. Мен Астанада қаламын. Осыдан екі жыл алдын квадраты үлкен пентхаус сатып алғанмын. Сол жерге көшемін.