Кино әлеміндегі дебюті «Гламур для дур» картинасынан басталған Ақбота, бұл жолы аталмыш фильмге қатысты тағы бір тың ақпаратты айтты. «Кешьюдің» экс-әншісі, өмірін күрт өзгерткен кинотуындыдан бір тиын да алмаған. Ал, актрисаның қаламақысы кімнің қалтасын қалыңдатты?   

Иә, бұл фильм Ақботаның өмірінде үлкен өзгеріс жасады. Әнші ару дәл осы комедияның түсірілім алаңында жүріп, экс-сүйіктісі Дәурен Айдарқұловты жолықтырды, кейін ана атанып ұлы Ибраһим дүниеге келді. Бірақ, тағдырының  сыйы мен сынын сан қабылдаған қыз, өзін дүйім жұртқа танытқан бұл кинотуындыдан бірде-бір тиын алмағанын айтады.

Ақбота Сейітмағамбет, әнші, актриса:

-Мен «Гламур для дур» фильмінде гонорар алған жоқпын. Өйткені, өзімінің продюсерім Баян Мақсатқызымен, өздерінің келісімшарттары болған.

Бұл ақпараттың ақиқатын білмекке, картина режиссерін сөзге тарттық. Асқар Ұзабаевтың айтуынша, Ақботаның қаламақасы продюсеріне беріліпті.

Асқар Ұзабаев, режиссер:

-Ақботаның гонорары жайлы айтатын болсам, біздің Баянмен арамызда ғана өзара келісімшарт болды. Себебі, сол сәтте ол «Кешьюдің» құрамында ән салған болатын. Тіпті, Ақботамен қаржы жайлы сөйлескен де жоқпыз.

Сейітмағамбет болса алғашқы образымен-ақ, халықаралық байқауда топ жарып үлгерді. Мәселен, ол Ресейдің «Улыбнись Россия» атты кинофестивалінде, «Гламур для дур» комедиясындағы Ұлжан рөлі үшін «Үздік актриса» номинациясын жеңіп алған-ды! Дегенмен, арада бірнеше айдың жүзі өтсе де, аталмыш марапат әлі күнге дейін Ақботаның қолына тимепті.

Асқар Ұзабаев, режиссер:

-«Үздік актриса» номинациясына арналған сыйлық, Мәскеудегі Қазақстан елшілігінде жатыр. Жақын арада жібереміз деп уәде берген болатын. Бірақ,  әлі күнге дейін хабар жоқ! Келген бойда бірден Ақботаға табыстаймыз.